Ölkədə indiyədək qeydə alınan ən böyük sığorta hadisəsi baş verib. Bu barədə martın 14-də Aqrar Sığorta Fondundan məlumat verilib.
Martın 5-də Qobustan rayonunda əsən güclü külək və yaranmış qum fırtınası 400 hektara yaxın sığortalanmış taxıl sahəsinə zərər vurub. Bəzi ərazilərdə taxıl bitkiləri kökündən çıxaraq məhv olub.
Aqrar Sığorta Fondunun əməkdaşları sığorta hadisəsini araşdırmaq məqsədilə martın 10-da Qobustan rayonunda olublar və fermerlərlə görüş keçiriblər.
Fondun idarə heyətinin sədri Fuad Sadıqovun sözlərinə əsasən, ilkin qiymətləndirməyə görə, sahibkarlara dəyən zərərin məbləği 400 min manat ətrafındadır.
“Baş verən hadisə qanunda nəzərdə tutulan prosedurlara uyğun araşdırılacaq, fermerlərə dəyən zərər müəyyən ediləcək və ona uyğun olaraq ödənişlərin edilməsi nəzərdə tutulur”, - deyə sədr bildirib.
Sahibkarlar əkin sahələrini sığortaladıqda təbii fəlakətlər, qasırğa, dolu, yanğın, vəhşi heyvanlar və üçüncü şəxslərdən dəyən zərərdən sığortalanmış olacaqlar. Fermerlərə dəstək üçün sığorta haqqının 50%-i dövlət tərəfindən ödənilir. Sığorta haqqının məbləğini Aqrar Sığorta Fondunun səhifəsində yerləşdirilmiş «Bitkiçilik kalkulyatoru» vasitəsilə hesablamaq olar.
