Cari il ərzində dövlət ittihamçılarının iştirakı ilə 13 762 cinayət işinə baxılıb. Bu haqda oktyabrın 1-də baş prokuror Kamran Əliyev məlumat verib.
Ümumilikdə cəmi 10 622 cinayət işinin istintaqı tamamlanıb ki, bunlardan 883-ü prokurorluq orqanlarında istintaq edilib.
Vurulmuş ziyanın ödənilməsinin təmin edilməsi məqsədilə istintaqı başa çatdırılmış cinayət işləri üzrə 21 milyon 184 min manat məbləğində əmlak üzərinə həbs qoyulub.
Kamran Əliyevin sözlərinə görə, prokurorluq işçilərinə 55 cinayət işi açılmışdır. Xidmət yoxlamaları zamanı onlar öz fəaliyyətini müasir tələblər səviyyəsində qura bilməyib, xidməti intizamın kobud pozuntusuna yol verib və vəzifələrini layiqincə yerinə yetirə bilməyiblər.
Həmin işçilərin 39 intizam məsuliyyətinə cəlb edilib, 5 nəfər vəzifədən azad olunmaqla 24 nəfərə töhmət və şiddətli töhmət verilib.
Baş prokuror qeyd edib ki, Ermənistanın beynəlxalq konvensiyalar şəraitində müharibə qaydalarını kobud şəkildə pozduğuna, dinc sakinləri qətlə yetirdiyinə görə Baş Prokurorluğun İstintaq idarəsində Cinayət Məcəlləsinin müvafiq maddələri ilə 75 cinayət işinə başlanılıb.
Bu məqsədlə erməni vandalizmi nəticəsində talan edilmiş, dağıdılmış yaşayış məntəqələrinə, tarixi, dini-mədəni abidələrə və digər əmlaklara dəymiş ziyanı istiqamətində prokurorluq orqanları tərəfindən müvafiq işlər davam etdirilir.
