Kiçik və Orta Biznesin İnkişafı Agentliyi (KOBİA) tərəfindən keçirilmiş birinci qrant müsabiqəsində qalib olan şirkət tərəfindən bal arılarının gənələrdən təmizlənməsi üçün qurğu artıq hazırlanıb. Bu barədə 22 sentyabr tarixində Agentliyin rəsmi saytında məlumat verilib.
“Əmir texniki xidmətlər” MMC-nin “ANTİVARROA” adlı qurğusu bu ilin avqust–sentyabr aylarında Göygöl rayonunun Üçtəpə kəndində yerləşən arıçılıq təsərrüfatında sınaqdan keçirilib və nəticələr uğurlu olub. Bu qurğunun əsas üstünlüyü elektrik enerjisi olmadan işləməsidir.
Qalib şirkətə 17 300 manat maliyyə vəsaiti ayrılıb və şirkət 3 il müddətinə gəlirlər üzrə mənfəət vergisindən azad edilib.
Sözügedən layihədə iştirak etmək üçün sahibkarlar ərizə formasını və lazım olan digər sənədləri yazılı formada və ya elektron qaydada KOBİA-ya göndərməlidirlər.
Bu günə kimi KOBİA tərəfindən 15 mikro və kiçik sahibkarlıq subyektinə “Startap” şəhadətnaməsi verilib.
