“Bir Müəllimin Manifesti” ixtisasartırma proqramına iştirak üçün növbəti sənəd qəbulu başlayıb. Bu barədə 25 avqust tarixində Report ADA Universitetinə istinadən xəbər verir.
Proqram Qazax Müəllimlər Seminariyası ADA Universitetinin Qazax Mərkəzi tərəfindən 2023-2024-cü tədris ilinə nəzərdə tutulub.
Bu, ADA Qazax Mərkəzində təqdim edilən ilk təhsil proqramıdır və üçüncü ildir ki, həyata keçirilir.
Proqramda yalnız regionlardan olan orta məktəb müəllimləri və direktorları iştirak edəcəklər.
İxtisasartırma proqramı əyani və onlayn formada yerli və xarici professor-müəllim heyəti tərəfindən tədris ediləcək.
Əyani dərslər Qazax Müəllimlər Seminariyasında/ADA Qazax Mərkəzində, ADA Universitetində və ADA Universitetinin Vaşinqton Mərkəzində baş tutacaq.
Proqramın ABŞ-də keçiriləcək hissəsinin 4-5 həftə müddətinə tamamilə əyani və ingilis dilində keçirilməsi nəzərdə tutulub. İxtisasartırma proqramına müraciət etmək istəyənlər ADA Universitetinin rəsmi veb-səhifəsinə keçid edərək, onlayn ərizə formasını bu il sentyabrın 4-dək doldurmalıdırlar.
“Bir Müəllimin Manifesti” ixtisasartırma proqramından 2021-2022-ci tədris ilində 38, 2022-2023-cü tədris ilində isə 21 regional iştirakçı məzun olub.
Proqramla bağlı ətraflı məlumatı ada.edu.az/bmm səhifəsindən əldə etmək olar.
