1993-cü ilin aprelində Kəlbəcərin işğalı zamanı Ermənistan silahlı dəstələri Başlıbel kəndində faciə törədiblər.
Rayonun işğalı zamanı 2 000 nəfərdən çox əhalisi olan kəndin 76 sakini evlərini tərk edə bilməyərək mühasirədə qalıb. Aprelin 2-də kənd sakinlərinin bir qrupu mühasirədən çıxmaq istədiyi zaman qətlə yetirilib və ya əsir götürülüb.
3 aprel 1993-cü ildə Ermənistan silahlı qüvvələri Kəlbəcərin Başlıbel kəndinə silahlı hücum edib. Erməni birləşmələri kənd sakinlərinin evlərini qarət edib və tamamilə yandırıb. Kəndi tərk edə bilməyən 62 nəfər təxminən 3 kilometr aralıda, kəndin ən hündür hissəsində yerləşən “Portda” adlanan dağ relyefli ərazidəki təbii mağaralara sığınıb.
Ermənistan silahlı qüvvələri 18 aprel 1993-cü ildə silahsız mülki şəxslərin qayalarda sığındığı yerləri aşkarlayıb, 6 saat atəşə tutublar. Hücum nəticəsində 18 nəfər qətlə yetirilib, 1 nəfər itkin düşüb, 14 nəfər isə əsir götürülüb. Həmin şəxslər sonradan azad edilsələr də, onlardan 9-u aldıqları psixoloji sarsıntılardan vəfat edib.
Sağ qalmış Başlıbel kənd sakinləri 12 may 1993-cü ildə gecə saatlarında həmyerlilərinin qətlə yetirildiyi mağaralara yaxınlaşıb, meyitlərini paltarlı vəziyyətdə dəfn ediblər.
Sağ qalmış 29 nəfər 113 gün mühasirə həyatı yaşadıqdan sonra Kəlbəcər rayonunun Çaykənd kəndinə, oradan Tərtər çayını və Qoşqar dağını keçməklə iyul ayında Daşkəsən rayonunun Zivlən kəndinə çataraq həyatlarını xilas edə biliblər.
