Cari ildə ali təhsilin bakalavriat səviyyəsi üzrə qəbul olanların sayında ötən illə müqayisədə 1047 nəfər artım olub. Bu barədə noyabrın 18-də Dövlət İmtahan Mərkəzindən məlumat verilib.
Magistratura səviyyəsi üzrə ərizə qəbulunda iştirak edən bakalavrların sayı isə ötən illə müqayisədə iki dəfədən artıq, yəni 18748 nəfər çox olub. Bu artım magistraturaya qəbul imtahanının bir mərhələ üzrə iki dəfə keçirilməsi ilə izah edilir.
Eyni zamanda 9 illik baza üzrə orta ixtisas təhsil müəssisələrinə qəbul olmaq istəyən məzunların sayında da artım müşahidə olunub. Bu onunla izah edilir ki, yeni qanunvericiliyə əsasən, subbakalavrlar öz ixtisasına uyğun şəkildə imtahan vermədən ali təhsil müəssisələrinə qəbul ola bilərlər.
Ümumilikdə, bu il ərizə qəbulunda iştirak etmiş şəxslərin sayı ötən illə müqayisədə 14% çox, ali və orta ixtisas təhsili müəssisələrinə qəbul olmuş şəxslərin sayı isə 5% çox olub.
