DOST İnklüziv İnkişaf və Yaradıcılıq Mərkəzində təlim keçən 50-dək şəxsə öz bacarıqları üzrə kiçik biznes sahələri qurmaları üçün bu il özünüməşğulluq proqramı çərçivəsində aktivlər veriləcək. Bu haqda 10 yanvar tarixində Əmək və Əhalinin Sosial Müdafiəsi Nazirliyinin saytında məlumat verilib.
Burada uşaq psixoloqları, sosial işçilər, surdoloqlar, psixo-pedaqoqlar üçün peşəkar təlim kursları təşkil olunur. Gələcəkdə mövcud yaradıcılıq sahələri ilə yanaşı DJ, İT və s. bacarıq sahələri üzrə də təlim qruplarının yaradılması planlaşdırılır.
Həmçinin mərkəz tərəfindən əlilliyi olan şəxslərin əl işlərindən ibarət satış-sərgilərin təşkili, inklüziv teatrlarla birgə tamaşalar hazırlanması, rəqs qrupunun yaradılması nəzərdə tutulub.
Qeyd edək ki, DOST İnklüziv İnkişaf və Yaradıcılıq Mərkəzinin açılışı 2021-ci ilin oktyabrında olub. Mərkəzdə əlilliyi olan və digər həssas qruplara aid şəxslər üçün müxtəlif yaradıcılıq növlərində təlim kursları təşkil olunur.
