Növbəti tədris ili üzrə peşə təhsil müəssisələrinə neçə yer ayrıldığı məlum olub. Bu barədə 28 iyul tarixində Report Peşə Təhsili üzrə Dövlət Agentliyinə istinadən məlumat verib.
2023/2024-cü tədris ili üzrə tələbə qəbulu 66 peşə təhsili müəssisəsində 128 ixtisas olmaqla 25 420 yer üzrə aparılacaq. Bunu agentliyinin direktor müavini Ceyhun Kərəmov deyib.
Ayrılan plan yerlərində ötənilki rəqəmlərlə müqayisədə 10 faiz artım var.
25 420 qəbul planında 18 290 yer dövlət sifarişli, 7 130 yer isə ödənişli əsaslarla olacaq. 1 260 yer yüksək texniki peşə, 22 020 yer texniki peşə, 2 140 yer isə ilk peşə üzrədir.
Peşə təhsili almaq istəyən şəxslər 28 iyul - 11 avqust tarixlərində portal.edu.az platformasında qeydiyyatdan keçib, “Peşə təhsili müəssisələrinə elektron tələbə qəbulu” xidməti vasitəsilə müraciət göndərməlidirlər.
Tələbə qəbulu prosesində iştirak edən hər bir şəxsə maksimum 5 ixtisas üzrə seçim etmək imkanı yaradılır.
