Cəlilabad rayonunda fermerlər üzüm yığımına davam edir. Bu haqda sentyabrın 6-da Azərtac xəbər verib.
Rayonda 1400 hektar üzüm bağı mövcuddur. Bağlarda üzümün 20-yə yaxın sortu becərilir, əsasən Fransa və İtaliyanın tanınmış üzüm tinglərinə üstünlük verilir. Ötən aydan bu günədək 6000 tona yaxın üzüm toplanılıb. Onlardan 400 tondan çoxu Rusiyaya ixrac olunub. Məhsulun satış qiyməti sortdan asılı olaraq 50 qəpik - 1 manat arasında dəyişir.
20 ildir üzümçülüklə məşğul olan Ramazan Əliyev 4 sort üzüm becərir - “Pirima”, “Ağadayı”, “Mahmudu” və “Moldova” sortu. “Bunlar çox dözümlü sortlardır. Həm qiymət, həm də daşınma baxımından da bizi qane edir. Bağlarda bol məhsul var”, - fermer söyləyib.
Yığım mövsümü başlayandan indiyədək Cəlilabadda 8 min tondan çox üzüm yığılıb. 2020-ci ildə isə bağlardan 23 min tona yaxın məhsul götürülüb.
