Cərimə borcu olduğuna görə avtomobili duracağa yerləşdirilən paytaxt sakini Azər Səfərov Dövlət Yol Polisi İdarəsinə gələrək özünü yandırmağa cəhd edib. Bu barədə dekabrın 16-da Daxili İşlər Nazirliyindən məlumat verilib.
Belə ki, idarəyə gələn sürücü əməkdaşlardan avtomobilinin buraxılmasını tələb edib. “Ona izah olunub ki, yalnız cəriməni ödədikdən sonra avtomobil buraxılacaq. Sürücü bundan əsəbləşərək, polis əməkdaşlarını təhqir edib və benzinlə özünü yandırmağa cəhd edib. Polis əməkdaşları cəhdin qarşısını alıb”, - deyə nazirlikdən bildirilib.
Qeyd olunub ki, ayağından yüngül yanıq xəsarəti alan sürücüyə ilkin tibbi yardım göstərilib. Hazırda polis şöbəsində araşdırma aparılır.
Qurumdan əlavə edilib ki, 31 yaşlı A.Səfərov əvvəllər qəsdən bədənə ağır xəsarət yetirdiyinə və adam öldürməyə cəhdə görə məhkum olub.
