Daxili İşlər Nazirliyi (DİN) yanvarın 8-də avtomobillərin texniki baxışı ilə bağlı sürücülərə xəbərdarlıq edib.
Sürücülərə nəqliyyat vasitələrini texniki cəhətdən saz saxlamaqla vaxtında texniki baxışa təqdim etmələri tövsiyə edilib. Həmçinin bildirilib ki, avtomobilin mühərrik nömrəsini texniki pasportda qeyd etdirməyən sürücülər inzibati qaydada 50 manat cərimə olunurlar.
2021-ci il ərzində texniki baxışa gətirilən 285 avtomobilin mühərrik, ban, şassi nömrələrinin qeydiyyat sənədlərindəki uçot göstəriciləri ilə uyğunsuzluq aşkarlanıb. Bu barədə Baş Dövlət Yol Polisi İdarəsinə məlumat göndərilib.
Bununla yanaşı, son zamanlar texniki baxış müddəti bitən nəqliyyat vasitələrinin sürücüləri qayda pozuntularından yayınmaq üçün avtomobillərinə başqa avtomobilə məxsus dövlət qeydiyyat nişanlarını bağlayırlar. Sözügedən sürücülər aşkarlanaraq cərimə olunurlar.
