“Saxta COVID-19 pasportu alanlar istintaqdan yayına bilməyəcək, sadəcə geci, tezi var”. Bu barədə DİN-in nümayəndəsi Elşad Hacıyev oktyabrın 25-də bildirib.
Nümayəndənin sözlərinə görə, saxta COVID-19 pasportunun alınması cinayət məsuliyyəti yaradır. Bəzi insanlar vaksin olunmayaraq, başqalarının da yoluxmasına səbəb ola bilərlər.
“Bu əməlləri törədən şəxslərin hər biri barəsində qətimkan tədbirləri seçilir. Saxta COVID-19 pasportu istifadə edən şəxs digərlərini koronavirusa yoluxdurarsa və ölümünə səbəb olarsa “Epidemiya əleyhinə rejimin, sanitariya-gigiyena və ya karantin rejimlərinin pozulması” maddəsi ilə məsuliyyətə cəlb oluna bilər”, - deyə Elşad Hacıyev qeyd edib.
Cinayət Məcəlləsinə əsasən, bu halda həmin şəxs 2 500 manatdan 5 000 manatadək cərimə və ya üç ilədək azadlığın məhdudlaşdırılması və ya üç ilədək azadlıqdan məhrum etmə ilə cəzalandırılır.
