Kikboks üzrə dünya çempionu Zaur Yusifovun qətlində təqsirləndirilən 22 yaşlı Samir Şirəliyev barəsində həbs qətimkan tədbiri seçilib. Bu barədə martın 17-də APA xəbər verib.
Binəqədi rayon Məhkəməsinin qərarına əsasən, saxlanılan şəxs barəsində 3 aylıq həbs qətimkan tədbiri seçilib. O, “qəsdən adam öldürmə” maddəsilə ittiham olunur.
İdmançı martın 14-ü axşam saatlarında 6-cı mikrorayonda yerləşən marketdə "Vinçester” markalı silahla güllələnərək öldürülüb.
Daha öncə, 2020-ci il mayın 9-da isə Zaur Yusifov kriminal aləmdə tanınmış Emin Səfərovun qətlinin sifarişində şübhəli bilinib. Lakin Yusifovun qətldə iştirakı sübuta yetirilmədiyinə görə ona bəraət verilib.
Saxlanılan Samir Şirəliyev öldürülən Emin Səfərovun xalası oğludur.
