Şəkərli xəstələrdə oruc tutmaq müxtəlif ağırlaşmaların inkişaf riskini artıra bilər. Qida rejimində kəskin dəyişiklik ketoasidoz, ketoasidotik və hiperosmolyar komaya, kəskin trombozun inkişafına, ağır hipoqlikemiyaya səbəb ola bilər. Bu haqda aprelin 14-də Səhiyyə Nazirliyinin mütəxəssis-eksperti Günay İsmayılova məlumat verib.
Qeyd edilənləri nəzərə almaqla oruc tutmazdan öncə diabet xəstələrinə həkimlərlə məsləhətləşmələri tövsiyə edilib. Həkimin sözlərinə əsasən, oruc tutan diabet xəstələri ağırlaşmalara görə 4 risk qrupuna bölünür:
- Çox yüksək risk qrupu - qlükoza səviyyəsini kontrol etməyənlər, tip 1 şəkərli diabet, xroniki böyrək çatışmazlığından, hər hansı yanaşı kəskin xəstəliklərdən əziyyət çəkənlər, hamilələr və s;
- Yüksək risk qrupu - hər hansı yanaşı xronik xəstəliklərdən əziyyət çəkənlər, makrovaskulyar ağırlaşmaları olan xəstələr və s;
- Orta risk qrupu - qanda qlükoza səviyyəsini ciddi kontrolda saxlaya bilənlər, hipoqlikemiyaya səbəb olma ehtimalı az olan dərman preparatlarını qəbul edənlər;
- Aşağı risk qrupu - yalnız pəhriz və ya metformin, glitazonlar, qliptinlər ilə müalicə olunan kafi glikemik nəzarəti olan xəstələr, hər hansı bir yanaşı xəstəlikləri olmayanlar və s.
Qurumun nümayəndəsi əlavə edib ki, ilk iki qrupa aid olanlara oruc tutmaq tövsiyə olunmur.
