I ixtisas qrupu üzrə ali təhsil müəssisələrinə qəbul imtahanı keçirilib. Bu barədə 22 iyul tarixində Dövlət İmtahan Mərkəzi məlumat yayıb.
İmtahan keçirilən şəhər və rayonlarda 91 imtahan binası, 1663 imtahan zalı ayrılıb.
91 ümumi imtahan rəhbəri, 273 imtahan rəhbəri, 2079 nəzarətçi-müəllim, 283 buraxılış rejimi əməkdaşı, 91 bina nümayəndəsi imtahanların idarə olunmasına ayrılıb.
7 nəfərdə mobil telefon aşkarlandığı üçün imtahandan xaric olunub. Onların nəticələri ləğv olunub.
İmtahanda 29 nəfər fiziki məhdudiyyətli (I qrup gözdən əlil, eşitmə əngəlli və digər) abituriyent də iştirak edib. Hərəkət məhdudiyyətli abituriyentlərin bina və zala daxil olması və rahat şəkildə hərəkəti üçün də xüsusi şərait yaradılıb.
İmtahanda istifadə olunmuş qapalı və kodlaşdırıla bilən açıq tipli test tapşırıqlarının doğru cavab etalonları yaxın saatlarda Mərkəzin “Telegram” kanalına, digər sosial şəbəkə hesablarına və saytına yerləşdiriləcək.
Sabah saat 14:00-da DİM-in “Youtube” kanalı vasitəsilə ediləcək canlı yayımda həm I, həm də IV ixtisas qrupu üzrə imtahanlarda istifadə olunmuş test tapşırıqları ilə bağlı geniş izahat veriləcək.
İyulun 23-dən etibarən imtahan protokolları və materialların emalına başlanılacaq.
İmtahanın nəticələrinin yaxın 2 həftə ərzində elan olunması nəzərdə tutulur.
