Bəzi gözəllik salonlarında qadınlara arıqlama dərmanı adı altında “patı” satılır. Bu barədə 9 avqust tarixində “ARB 24”ün “Gündəm” verilişində polis mayoru Elşad Hacıyev bildirib.
“Gözəllik salonlarında bu hal müşahidə edilib. Aşkarlanan faktlarla bağlı tədbir görülüb və qarşısı alınıb. Həmin şəxslər məsuliyyətə cəlb olunublar. Onlar maddənin çəki azaltmaqda təsiri olduğunu desələr də, onun narkotik vasitə olmasını söyləmirlər”, - DİN-nin əməkdaşı bildirib.
Polis mayoru valideynləri də diqqətli olmağa səsləyib:
“Valideynlər övladlarının xarakterində, hərəkətlərində dəyişiklik müşahidə etdikdə, onları müvafiq qaydada yoxlatdırsın. Çətinlik çəksələr, dövlət qurumlarına müraciət etsinlər. Dövlət qurumları tərəfindən zəruri köməkliklər göstəriləcək”.
"Patı" adlanan maddə şüşə tərkibli sintetik narkotikdir. O, bədəndə yaralar yaradır, ağ ciyəri deşir və dişləri çürütməyə başlayır. Mütəmadi istifadə edən şəxslərin maksimum 3-4 il ömrü olur.
