Dövlət Sərhəd Xidmətinin Mi-17 hərbi helikopterinin qəzaya uğramasına kənardan müdaxilə ehtimalı istisna edilib. Bunu DSX-nın rəisi Elçin Quliyev noyabrın 30-da keçirdiyi mətbuat konfransında deyib.
O, həmçinin qeyd edib ki, helikopter nisbətən yeni olub və qısa müddət əvvəl təmirdən keçib. Elçin Quliyev qəzaya uğrayan helikopterin pilotununun təcrübəli olduğunu vurğulayıb: “Helikopterin pilotu – polkovnik Fizuli Cavadov ağır şəraitdə uçuşlara yüksək hazırlıqlı, uçuş imkanı və icazəsi olan pilotlarımızdan biridir”.
Qəzanın səbəbi hələ ki, məlum deyil. Hazırda mütəxəssislər “qara qutu” ilə işləyirlər.
DSX rəisi helikopter qəzasında həlak olan hərbçilərə şəhid statusu veriləcəyini deyib: “Qanunvericilik hərbi təlimlərdə həlak olan hərbi qulluqçulara avtomatik olaraq şəhid statusunun verilməsini nəzərdə tutur”.
Elçin Quliyev yaralıların vəziyyətindən də danışıb. Onun sözlərinə görə, hər iki zərərçəkmiş DSX-nın hərbi hospitalındadır: “Səhhətləri normaldır. Həkimlər onların sağalması üçün zəruri tədbirlər görür”.
Noyabrın 30-da 10:40 radələrində DSX-nın hərbi helikopteri Xızı rayonunda qəzaya uğrayıb. Nəticədə 14 nəfər həlak olub, 2 nəfər isə yaralanıb. Hadisə rayonun “Qaraheybət” aviasiya poliqonunda təlim uçuşları yerinə yetirərkən baş verib.
