Baş Dövlət Yol Polisi İdarəsi noyabrın 2-də sürücü və sərnişinlərə müraciət edib. Müraciətdə BDYPİ sürücü və sərnişinləri ətraf-mühitə ziyan vurmamağa çağırıb.
Son zamanlar nəqliyyat vasitələrindən yollara və küçələrə məişət tullantılarının atılmasına tez-tez rast gəlinir. Məlumata əsasən, cari ilin 9 ayı ərzində bu səbəbdən 301 şəxs cərimələnib.
Müraciətdə bildirilir ki, hər bir vətəndaş ətraf mühitin qorunmasında öz üzərinə düşən vəzifələri yerinə yetirməli və təmizliyə riayət etməlidir. Bəzi sürücülər və sərnişinlər çəkdikləri siqaret kötüyünü, avtomobilin içərisində yedikləri qidaların qalıqlarını, plastik su qablarını və digər məişət tullantılarını nəqliyyat vasitəsindən bayıra atırlar.
“Yol hərəkəti haqqında” qanuna əsasən, nəqliyyat vasitəsindən çölə hər hansı əşya atmaq qadağandır və buna görə 40 manat məbləğində cərimə nəzərdə tutulub.
"Biz insanları sırf cərimədən qorunmaq üçün deyil, belə əməllərin ətraf-mühitə ziyan vurduğunu nəzərə alaraq, bu kimi hallara yol verməməyə çağırırıq. Belə hərəkətlər qeyri-etik olmaqla bərabər eyni zamanda mədəniyyətin göstəricisi kimi qiymətləndirilir", - deyə DYP vurğulayıb.
