Baş Dövlət Yol Polisi İdarəsi sürücülərə müraciət edib. Bu barədə martın 26-da idarədən məlumat verilib.
Qeyd olunub ki, Novruz bayramı ilə əlaqədar müxtəlif rayonlara səfər etmiş əhalinin daimi yaşayış yerlərinə qayıtması yollarda sıxlıq yaradır. Bu və son günlər havaların qeyri-sabit keçməsi yol qəzalarının ehtimalını artırır.
Sürücülərdən təhlükəsizlik qaydalarına əməl etmək, yorğun, yuxusuz və ya sərxoş vəziyyətdə nəqliyyat vasitəsini idarə etməmək xahiş edilir.
“Sürücüləri yola çıxmazdan əvvəl nəqliyyat vasitələrinin texniki sazlığına diqqət yetirməyə, yolboyu ötmə və manevretmə qaydalarına, sürət rejiminə ciddi əməl etməyə çağırırıq”, - deyə əlavə edilib.
Uzaq məsafə qət edən sürücü və sərnişinlər qısa müddətli istirahət üçün DYP-nin stasionar postlarında yaradılmış şəraitdən istifadə edə bilər.
