Dekabrın 8-də Baş Dövlət Yol Polisi İdarəsi sürücülərə xəbərdarlıq edərək onlardan təcrübələrindən asılı olmayaraq yollarda məsuliyyətli olmalarını bildirib. Bu barədə idarənin rəsmi portalında məlumat paylaşılıb.
Yolların sürüşkən olması, hərəkət hissəsinin tam işıqlandırılmaması, piyada keçidlərinin olmaması və digər amillər yol-nəqliyyat hadisələrinin səbəbi ola bilərlər. Lakin qəzaların əsas səbəbi yol hərəkəti qaydalarının pozulması olur.
Statistikaya əsasən, qəzaların çoxu 10 ildən artıq sürücülük təcrübəsi olan şəxslərin təqsiri üzündən baş verib.
Sürücülük vəsiqəsi əldə ediləndən sonra birinci onillik ərzində şəxslərin məsuliyyət hissi növbəti onilliklərlə müqayisədə daha çox olur. Daha sonra isə sürücülərdə arxayınlıq və özünə güvənmə yarandığına görə məsuliyyət hissi azalır. Nəticədə isə qəzalar baş verir.
Baş Dövlət Yol Polisi İdarəsi hər kəsi yollarda intizamlı olmaqla ölkəmizdə yol hərəkəti mədəniyyətinin möhkəmlənməsinə və qəzaların sayının azaldılmasına yardımçı olmağa dəvət edir.
