Fermerlərə subsidiyalar yalnız torpaqların çıxarışı ilə veriləcək, digər sənədlər subsidiya almaq üçün əsas sayılmayacaq. Bunu 28 oktyabr tarxində Real TV-də yayımlanan “Fermerin real dostu” verilişində Kənd Təsərrüfatı Nazirliyinin nümayəndəsi Firudin Tağıyev bildirib.
Onun sözlərinə görə, vaxtilə kənd sakinlərinə pay torpaqları verilərkən dövət aktı və şəhadətnamələr təqdim edilirdi. Dövlət aktı torpaqdan daimi istifadə (qırmızı kağız), şəhadətnamə isə torpaqdan müvəqqəti istifadə hüququnu (göy kağız), yəni icarə hüququnu təsdiq edirdi.
“Qırmızı sənəd” daşınmaz əmlakın reyestrindən çıxarış sənədidir və torpağın fermerə aid olduğunu bildirir. “Göy sənəd” isə torpaq sahəsinin kadastr planıdır. “Fermerlər elə bilir ki, “göy sənəd” hüquqi qüvvə daşıyır, amma elə deyil, bu texniki sənəddir. Və bizə yalnız həmin torpağın məkan göstəricilərinin yerini bilmək üçün tələb olunur. Yəni bu sənəd olmasa da olar”, - deyə Firudin Tağıyev bildirib.
Fermerlər torpaq sahələrinin çıxarışlarını əldə etmək üçün sadəcə şəxsiyyət vəsiqələrini təqdim etməklə Daşınmaz Əmlakın Dövlət Reyestri Xidmətinin yerli qurumlarına, Dövlət Aqrar İnkişaf Mərkəzlərinə və ya «Səyyar Asan» xidmətlərinə müraciət edə bilərlər.
Vətəndaşların çıxarış əldə etməsi ödənişsizdir.
2025-ci ildən etibarən bütün dövlət yardımları yalnız çıxarış (“kupça”) ilə veriləcək.
