FHN yanğın təhlükəsizliyi ilə bağlı xəbərdarlıq edib

Fövqəladə Hallar Nazirliyi (FHN) havaların kəskin soyuması ilə bağlı yanğın təhlükəsizliyinə dair dekabrın 22-də əhaliyə müraciət edib.

Məlumata əsasən, ölkədə bir neçə gün davam edəcək soyuq və yağıntılı hava şəraiti qaz və elektrik qızdırıcı cihazlarından istifadənin artmasına səbəb olur. Bu, elektrik şəbəkələrin həddindən artıq yüklənməsi, həmçinin nasaz, qeyri-standart və ya kustar üsulla hazırlanmış qaz və elektrik qızdırıcı cihazlarının istifadəsi yanğınla nəticələnə bilər.

FHN əhaliyə müraciət edərək yanğın təhlükəsizliyi qaydalarına riayət etmələrini tövsiyə edir:

• nasaz, qeyri-standart və ya kustar üsulla hazırlanmış qızdırıcı cihazlardan istifadə etməyin;


• elektrik şəbəkəsini həddindən artıq yükləməyin;


• işlək vəziyyətdə olan qızdırıcı cihazları nəzarətsiz qoymayın, onları uşaqlara həvalə etməyin;


• qızdırıcı cihazların bilavasitə yaxınlığında yanar materiallar və asan alışan mayelər saxlamayın;


• cihazlardan zavod istehsalçılarının təlimatlarına (tövsiyələrinə) uyğun istifadə edin;


• elektrik və qaz şəbəkəsinin quraşdırılmasını yalnız mütəxəssislərə həvalə edin və bu məqsədlə keyfiyyətli məhsullardan istifadə edin;


• mütəmadi olaraq qızdırıcı cihazların və tüstü bacalarının istismara yararlılığını mütəxəssislərə yoxlatdırın;


• mənzildə qaz qoxusu hiss etdikdə işığı yandırmayın, qapı-pəncərələri açın, mənzilə qazın girişini bağlayın və mütəxəssis çağırın.