FHN Yeni il bayramı ilə bağlı əhaliyə müraciət edib
Fövqəladə Hallar Nazirliyi dekabrın 20-də Yeni il bayramında əsas təhlükəsizlik qaydaları ilə əlaqədar əhaliyə müraciət edib. İlk növbədə koronavirus pandemiyası ilə bağlı bayramın xüsusi karantin rejiminin qaydalarına uyğun təşkil olunması qeyd edilib.
Bununla yanaşı, Yeni il bayramı ilə əlaqədar yanğın təhlükəsi xeyli artır və buna görə zəruri yanğın təhlükəsizliyi qaydalarına riayət edilməlidir:
evlərdə və şənlik məkanlarında bəzədilən küknar ağacı yerə möhkəm bərkidilməli, ağacın budaqları tavana və divarlara toxunmamalı;
işıqlandırmada saz və standarta uyğun elektrik qurğu və cihazından istifadə edilməli;
ağac tezalışan oyuncaqla bəzədilməməli;
qapalı məkanda atəşfəşanlıq edilməməlidir.
Həmçinin bayram şənliyi keçirilən məkanlarda təxliyə yolları işlək vəziyyətdə olmalıdır. Elektrik şəbəkəsində gərginliyi azaldan transformatorlardan istifadə olunmadığı halda çilçıraqlarla bəzədilərkən 12 Volta qədər gərginlikdən və 25 voltdan çox olmayan lampalardan istifadə olunmalıdır.
Vətəndaşlar təhlükə zamanı nazirliyin “112” qaynar xəttinə zəng edə bilərlər.
