Külli miqdarda dələduzluq etməkdə təqsirləndirilən Astara dəmiryolu gömrük postunun rəisinə hökm oxunub. Məhkəmənin qərarı ilə Samir Məmmədova şərti cəza verilib. Bu haqda dekabrın 18-də Report məlumat yayıb.
Belə ki, sözügedən şəxs yüksək vəzifəsindən sui-istifadə edərək sahibkar uşaqlıq dostunun 192 min manat pulunu ələ keçirib. S.Məmmədov tanışına torpaq sahəsinin sənədləşdirilməsi və mülkiyyət hüququnu təsdiq edən çıxarışı alacağını söz verib. Lakin o, vədinə əməl etməyib.
Gömrük rəisi məhkəmədə dindirilərkən özünü təqsirli bilmədiyini deyib. O, ifadəsində göstərib ki, 1991-ci ildən zərərçəkmişlə ortaq biznes ilə məşğul olub, 2001-ci ildən isə Dövlət Gömrük Komitəsində işə başlayıb və keçən ilə qədər rəhbər vəzifələrdə çalışıb.
Bununla yanaşı, məhkəmədə qeyd edilən şəxs ilə əlbir olanlara da hökm oxunub. Cavidan İbrahimova şərti, Azər Orucova isə 8 il müddətinə azadlıqdan məhrum etmə cəzası verilib.
