18 kiloqramdan artıq zərgərlik məmulatlarının gömrük nəzarətindən gizlətməklə qanunsuz keçirilməsinin qarşısı alınıb.
Oktyabrın 28-də Dövlət Gömrük Komitəsindən verilən məlumata görə, ölkə ərazisinə Gürcüstan istiqamətindən "çipsi" yükü gətirən "Mercedes-Benz" markalı avtomobil "Qırmızı Körpü" gömrük postuna daxil olub. Rentgen qurğusu ilə baxış zamanı avtomobilin arxa təkərlərinin arasında yerləşən hava balonunda şübhəli cizgilər qeydə alınıb.
Nəticədə hava balonunda əlavə bağlamaların gizlədildiyi məlum olub. Bağlamalara baxış zamanı onların içərisində ümumi çəkisi 18 kiloqram 172 qram olan qızıl-zinət əşyası aşkarlanıb.
