Qrafist-dizayner Aydan Rzayeva əmək hüquqlarının pozulduğuna görə müvafiq orqanlara müraciət edərək işəgötürənin cəzalandırılmasına nail olub. Bu barədə 21 oktyabr tarixində Dövlət Vergi Xidməti ATV kanalı tərəfindən hazırlanan reportaj yayımlayıb.
2020-ci ildə Aydan Rzayeva özəl şirkətlərdən birində işə düzəlib və işəgötürən tərəfindən ona əmək müqaviləsinin imzalanacağı barədə söz verilib. Lakin sahibkar verdiyi sözə əməl etməyib. Buna görə də A.Rzayeva iş yoldaşı ilə birlikdə Dövlət Əmək Müfəttişliyi və Dövlət Vergi Xidmətinə şikayət edib.
“Şikayətimiz əsasında Əmək Müfəttişliyi həmin sahibkarı iki nəfəri əmək müqaviləsiz işlətdiyinə görə hüquqi şəxs olaraq 20 min manat, vəzifəli şəxs olaraq 4 min manat dəyərində cərimələdi. O bu qərar ilə razı olmadı və məhkəməyə müraciət etdi. Hakim isə bizim xeyrimizə qərar verdi”, - deyə qrafist-dizayner söyləyib. İşəgötürən məhkəmənin qərarı ilə razılaşmadığı üçün apellyasiyaya müraciət etsə də, şikayəti təmin edilməyib.
“2020-2021-ci illər ərzində 118 əmək müqaviləsiz işləyən şəxslərlə bağlı inzibati icraata başlanılmışdır və ümumilikdə 1 milyon 310 min manat dəyərində cərimələr tətbiq olunmuşdur”, - deyə Dövlət Əmək Müfəttişliyi Xidmətinin nümayəndəsi Araz Bayramzadə bildirib.
Dövlət Vergi Xidmətinin şöbə rəisi Gülnar İsayevanın sözlərinə görə, qanunu pozan işəgötürənləri cərimələr gözləyir: “İşəgötürənə 1-ci dəfə pozuntuya yol verildikdə 2000 min manat məbləğində, 2-ci dəfə yol verildikdə 4000 min manat məbləğində, 3 və daha çox dəfə yol verildikdə isə 6000 min manat məbləğində maliyyə sanksiyası tətbiq olunur”.
