Göyçayda qızıl mağazasından 45 min manatlıq oğurluq edən şəxslər saxlanılıb. Bu barədə 29 mart tarixində Report məlumat verib.
Məlumatda bildirilib ki, polis əməkdaşları tərəfindən şübhəli bilinən rayonun Bəydövül kənd sakini və iki yetkinlik yaşına çatmayan şəxs tutularaq istintaqa təhvil verilib.
Saxlanılan şəxslər mağazadan oğurluq etməyi bir neçə gün əvvəl planlaşdırıblar. Martın 26-da planlarını reallaşdırmaq məqsədilə yetkinlik yaşına çatmayanlardan biri mağazaya daxil olub. Satıcının yerində olmamasından istifadə edərək qızılları götürüb, oradan uzaqlaşmaq istəyərkən çıxışda mağazanın sahibi ilə rastlaşıb və oyuncaq tapança ilə ona hədə-qorxu gəlib və qaçmağa başlayıb. Oğurlanan qızılları sonradan paytaxtda satmaq məqsədilə torpağa basdırıblar.
Faktla bağlı cinayət işi başlanılıb və torpağa basdırılmış qızıl-zinət əşyaları həmin yerdən maddi sübut kimi götürülərək istintaqa təqdim olunub.
