2022-ci ilin dövlət büdcəsi zərfi çərçivəsində Vergi Məcəlləsinə dəyişiklik edilib. Qanunvericiliyə edilən dəyişikliklərin məqsədlərindən biri sosial xarakterli güzəştlər vasitəsilə əhalinin maliyyə-vergi yükünün azaldılmasıdır. Xüsusilə şəhid ailələri və müharibə iştirakçıları üçün yeni vergi güzəştləri müəyyənləşdirilib. Bu barədə 7 dekabr tarixində Dövlət Vergi Xidmətinin saytında məlumat verilib.
Belə ki, dəyişiklik Vətən müharibəsində şəhid olmuş şəxslərin ailə üzvlərinin, o cümlədən iştirakçıların banklara və kredit təşkilatlarına olan borclarının silinməsi nəticəsində bankların əldə etdikləri gəlirlərin gəlir vergisindən azad edilməsini əks etdirir.
Eyni zamanda şəhid olmuş şəxslərin ailə üzvlərinə və qazilərə verilən maddi yardımın 20 min manatadək olan hissəsinin gəlir vergisindən azad edilməsi nəzərdə tutulur.
Gəlir vergisi üzrə digər dəyişiklik ölkə daxilində müalicə haqlarının dəyərinin 10 min manatadək olan hissəsinin, xaricdə müalicə haqlarının dəyərinin 50 min manatadək olan hissəsinin gəlir vergisindən azad edilməsidir.
