I ixtisas qrupunda bəzi ixtisaslar üzrə imtahan fənlərinə 2023/2024-cü tədris ilindən etibarən informatika əlavə ediləcək. Bu barədə Dövlət İmtahan Mərkəzi oktyabrın 29-da məlumat verib.
Yeni qərara əsasən, I qrupda olan ixtisaslar informatika yönümlü (Rİ) və mühəndislik yönümlü (RK) altqruplarına bölünüb. Rİ altqrupuna daxil olan ixtisasların müsabiqəsində iştirak etmək istəyən abituriyentlər imtahanın 2-ci mərhələsində riyaziyyat və fizika fənləri ilə yanaşı informatika fənnindən imtahan verəcəklər. RK altqrupunda olan ixtisaslara daxil olmaq istəyən abituriyentlərin isə kimyadan imtahan vermələri nəzərdə tutulur.
Hər iki altqrupda olan ixtisasların müsabiqəsində iştirak etmək istəyən abituriyentlər isə 2-ci mərhələdə riyaziyyat, fizika, kimya və informatika fənləri üzrə imtahan verməlidirlər.
İmtahanlardan sonra həmin abituriyentlər universitetlərə elektron ərizə doldurarkən istədikləri ixtisaslara əsaslanaraq iki altqrupdan birini, yaxud hər iki altqrupu seçə biləcəklər.
Daha öncə, oktyabrın 27-də III qrupda olan ixtisaslar dil-tarix və tarix-coğrafiya altqruplarına bölünüb. Həmçinin III ixtisas qrupunda bəzi ixtisaslar üzrə imtahanlara 2022/2023-cü tədris ilindən etibarən coğrafiya fənni əlavə ediləcək.
