Ağsu Rayonu İcra Hakimiyyətinin həbs edilən vəzifəli şəxsləri Sənan Feyzullayev və Vüqar Əsgərovun işi üzrə ibtidai istintaq yekunlaşıb.
Modern.az-ın əldə etdiyi məlumata görə, iş üzrə toplanan materiallar araşdırılması üçün Şamaxı rayon Məhkəməsinə göndərilib.
İşə hakim Fərid Yaqubovun sədrliyi ilə baxılacaq. İş icraata götürülüb, məhkəmənin vaxtı dəqiq məlum deyil.
Qeyd edək ki, bu ilin sentyabrında aparılmış istintaq-əməliyyat tədbirləri ilə Ağsu Rayonu İcra Hakimiyyətininərazi idarəetmə və yerli özünüidarəetmə orqanları ilə iş şöbəsinin müdiri Feyzullayev Sənan Nadir oğlu və Əmlak Məsələləri Dövlət Xidmətinin Şamaxı Ərazi şöbəsinin Torpaqların idarə edilməsi və istifadəsinə nəzarət sektorunun Ağsu rayonu üzrə məsləhətçisi Əsgərov Vüqar Səxavət oğlununun inayət əlaqəsinə girərək aidiyyəti dövlət orqanlarının səlahiyyətli vəzifəli şəxslərinin qərarlarına qanunsuz təsir göstərməklə Ağsu rayonu ərazisində yerin təkindən istifadəyə dair icazə verilməsi üçün vətəndaşdan müxtəlif məbləğlərdə pul vəsaiti tələb etmələrinə və almalarına əsaslı şübhələr müəyyən edilib.
Toplanmış ilkin sübutlar əsasında Vüqar Əsgərov və Sənan Feyzullayevə Cinayət Məcəlləsinin 312-1.1-ci (nüfuz alveri) maddəsi ilə ittiham elan edilməklə müstəntiqin vəsatəti və ibtidai araşdırmaya prosessual rəhbərliyi həyata keçirən prokurorun təqdimatı əsasında Binəqədi Rayon Məhkəməsinin qərarı ilə ev dustaqlığı (əsas) və vəzifədən kənarlaşdırma (əlavə) qətimkan tədbirləri seçilib.
