Böyük Britaniya işsizlərə çəki azaltmaq üçün iynələr təklif edəcək
Böyük Britaniyada piylənmədən əziyyət çəkən işsizlərə çəki azaltmaq üçün iynələrin təyin edilməsi “Avropanın kök adamının” iqtisadi potensialını ortaya çıxara bilər, deyə Səhiyyə naziri bildirib.
İnsanoid.com BBC-yə istinadən xəbər verir ki, Böyük Britaniya Səhiyyə Nazirliyi piylənmə diaqnozu olan işsizlərə arıqlamaq üçün iynələr təklif edilməsi və bununla da onların iş həyatına qayıtmalarına kömək olunmasını nəzərdə tutan planları açıqlayıb. Bu addım nəticədə Britaniya iqtisadiyyatının böyüməsini sürətləndirməyi hədəfləyir.
Məsələ, dünyanın ən böyük yağ yandırıcı dərman istehsalçılarından biri olan “Lilly” şirkətinin 280 milyon funt sterlinq (619 milyon manat) dəyərində sərmayə qoyması ilə bağlıdır.
Şirkət bildirib ki, bu proqram bu cür maddələrin qeyri-klinik təsirlərini, yəni əmək bazarına, iqtisadi məhsuldarlığa və səhiyyə sisteminə olan yükə təsirini araşdırmağa imkan verəcək.
Səhiyyə naziri Ues Stritinq isə yeni dərman sinfinin piylənmə probleminə “böyük” təsir göstərə biləcəyinə və Böyük Britaniyanın daha çox işçi qüvvəsi ilə təmin olunmasına əminliyini bildirib.
O, Daily Telegraph qəzetindəki məqaləsində ölkənin sağlamlıq vəziyyətini qaranlıq şəkildə təsvir edərək deyib: “Biz, bir millət olaraq, daha çox yeyirik, daha az sağlam qidalar qəbul edirik və az hərəkət edirik. Bunun insana olan nəticələri aydındır — daha az sağlam və qısa ömür”.
Mövcud rəqəmlərə görə, piylənmə hazırda ölkə iqtisadiyyatına hər il 3,2 milyard funt sterlinqə (7 milyard manat) başa gəlir, bunun təxminən yarısı əmək məhsuldarlığının azalması ilə əlaqələndirilir.
