Kənd Təsərrüfatı Nazirliyi və Almaniya Beynəlxalq Əməkdaşlıq Cəmiyyəti tərəfindən Kürdəmir rayonundan olan qadın fermerlərə dəstək göstərilib. Onlar üçün arıçılıq təsərrüfatları yaradılıb. Bu barədə 11 noyabr tarixində Kənd Təsərrüfatı Nazirliyinin rəsmi səhifəsində məlumat yayılıb.
Layihə çərçivəsində göstərilən dəstək tədbirlərindən Kürdəmir rayonunun Bağman, Garis-Əyribənd və Karrar kəndlərindən olan və layihələrə müraciət edən qadın fermerlər faydalanıblar. Onlar üçün arıçılıq sahəsi üzrə nəzəri və təcrübi modullardan ibarət təlimlər keçirilib. Təlimləri uğurla tamamlayan qadınlar müvafiq sahə üzrə arı yeşikləri, arı ailələri və digər ləvazimatlarla təmin olunublar. Həmçinin onlara növbəti 1 il ərzində konsultasiya xidməti göstəriləcək.
Qeyd edək ki, layihəyə 600-ə yaxın müraciət daxil olub, 145 təsərrüfata baxış keçirilib və qiymətləndirmə aparılıb. Ümumilikdə 98 təsərrüfat sahibinə isə dəstək göstərilib.
