Aprelin 16-da Kəlbəcər rayonunun Günəşli kəndinə bir qrup sakinin ziyarəti zamanı yolun üzərində tank əleyhinə mina aşkarlanıb. Minaaxtaran hərbçilərin peşəkarlığı nəticəsində çoxlu sayda insan itkisinin qarşısı alınıb.
Səfərdə Kəlbəcər sakinlərindən, dövlət qurumlarının nümayəndələrindən və İTV-nin çəkiliş qrupundan ibarət 20 nəfər iştirak edib. Avtobus yolunun üzərindəki minanı əsgər Mərdalı Aşurov aşkarlayıb.
Məlumata görə, mina buraya 2020-ci il noyabrın 10-dan 25-dək olan müddətdə - Kəlbəcərin təhvil verilməsi üçün istənilən möhlətdə basdırılıb.
Qeyd edək ki, bu günədək azad edilmiş ərazilərdə 15 026 hektar ərazi mina və partlamamış döyüş sursatlarından təmizlənib. Nəticədə 6 095 ədəd piyada əleyhinə, 2 172 ədəd tank əleyhinə və 9 368 partlamamış sursat məhv edilib.
