Son zamanlar sosial şəbəkələrdə plastik kartlarla edilən bütün növ ödənişlərdən 18% ƏDV-nin tutulduğu müzakirə edilir. Bu barədə 28 oktyabr tarixində Dövlət Vergi Xidməti ATV kanalı tərəfindən hazırlanan reportaj yayımlayıb.
Dövlət Vergi Xidmətinin şöbə rəisi Məmməd Quliyev bildirir ki, ölkə daxilində plastik kartlar ilə nağdsız ödənilən məbləğdən ümumiyyətlə ƏDV tutulmur. Sözügedən vergi bəzi hallarda xarici sahibkarlardan və şirkətlərdən iş və xidmətləri alarkən tutulur. Lakin ƏDV-nin tutulması xaricdən alınan mallara şamil olunmur.
“Misal olaraq, hər hansı bir proqram təminatını əldə edərkən bank kartı vasitəsi ilə ödənilmiş məbləğdən banklar tərəfindən 18% ƏDV tutulur”, - deyə Məmməd Quliyev məlumat verib.
Şöbə rəisi əlavə edib ki, aviabiletlərin və yaxud otel xidmətlərinin dəyərinin ödənilməsi zamanı hər hansı vergi məbləği tutulmur.
Nağdsız ödənişlərin genişləndirilməsi üçün dövlət orqanları və bank sistemi stimullaşdırıcı tədbirlər həyata keçirir. Məsələn, Dövlət Vergi Xidmətinin “ƏDV geri al” layihəsi çərçivəsində nağd ödəniş edənlər ödədikləri verginin 10%-ni, nağdsız ödəniş edən istehlakçılar isə 15%-ni geri ala bilirlər. Əlavə olaraq, bəzi banklar nağdsız ödəniş edənlərin pulunun müəyyən hissəsini bonus olaraq istehlakçıya geri qaytarır.
2021-ci ilin sentyabr ayından ölkə əhalisi bank kartları ilə elektron ticarət şəbəkəsində 710 milyon manat həcmində ödəniş həyata keçirib. Bu indiyədək qeydə alınan ən yüksən aylıq göstəricidir.
