Qusar və Xaçmaz rayonlarında Kənd Təsərrüfatı Nazirliyi tərəfindən növbəti görüşlər keçirilib. Bu barədə 13 dekabr tarixində nazirliyin saytında bildirilib.
Fermerlərə məlumat verilib ki, əkinlərin bəyanı dekabrın 30-da başa çatır. Görüşlərdə, həmçinin qeyd olunub ki, fermerlər subsidiya almaq üçün əkin məlumatlarını və torpaq sənədlərini EKTİS-ə daxil etməlidirlər. Bundan əlavə, vurğulanıb ki, 5 hektardan çox sahəsi olan sahibkarlar sahələrindən torpaq nümunələrinin aqrokimya laboratoriyalarına təqdim etməlidirlər, sahəsi 10 hektardan artıq əkin sahəsi isə sığortalanmalıdır.
Tədbirlərdə bildirilib ki, fevral-mart aylarında payızlıq əkinlərə görə subsidiyaların ödənişinə başlanacaq.
2025-ci il yanvarın 1-dən etibarən əkin sahələrinin istifadəçilərinə aqrar sahədə subsidiyalar torpaq sahəsi üzərində mülkiyyət, icarə və ya istifadə hüquqlarına dair daşınmaz əmlakın dövlət reyestrindən çıxarış əsasında veriləcək. Buna görə, vətəndaşlar dövlətin yaratdığı imkanlardan faydalanaraq torpaq üzərində mülkiyyət hüquqlarını rəsmiləşdirməlidirlər.
Bununla Kənd Təsərrüfatı Nazirliyinin taxılçılıq rayonlarında təşkil etdiyi məlumatlandırma sessiyaları başa çatıb. Beləliklə, 40-dək rayonda görüşlər keçirilib.
