Kürdəmirin həbsdə olan sabiq icra başçısı Ceyhun Cəfərov məhkəmədə elan edilmiş ittiham üzrə özünü qismən təqsirli bilib. Bu haqda aprelin 19-da Report məlumat yayıb.
O, Rayon Mərkəzi Xəstəxanasının müxtəlif vaxtlarda baş həkimlərindən rayon tədbirlərinə xərclənməsi üçün pul aldığını etiraf edib.
“2015-ci ilin iyun ayından etibarən müavinim göstərişim əsasında baş həkimdən ildə iki dəfə olmaqla 1 000 manat tələb edərək alıb. Digər baş həkimdən isə 3 il ərzində ildə iki dəfə olmaqla eyni məbləği alıb”, - deyə təqsirləndirilən şəxs əlavə edib.
Keçmiş icra başçısının sözlərinə görə, həmin pullar “Ölkəmizi tanıyaq” layihəsinə sərf olunub. Ümumilikdə bir baş həkimdən 3 il ərzində 6 dəfə olaraq, 6 000 manat, digərindən isə iki dəfə olaraq 2 000 manat götürüb.
Qeyd edək ki, Ceyhun Cəfərov və müavini 8 il 6 ay, pul verənlər isə hər biri 8 il 3 ay azadlıqdan məhrum edilib.
