Cari ilin dekabrın 15-dək 54 minə yaxın şəxsə əlillik təyin edilib, onlardan 16 500-ü ilkin, qalanı təkrar təyinatlardır. Bu ötən illə müqayisədə iki dəfə çoxdur. Bu haqda Əmək və Əhalinin Sosial Müdafiəsi Nazirliyindən məlumat verilib.
Ümumilikdə 2018-2021-ci illərdə 151 min şəxsə əlillik təyinatı aparılıb. Əlillik təyin edildikdən sonra onlara pensiya və ya müavinətlərin təyinatı aparılıb. Həmçinin müharibə əlilləri, I dərəcə əlilliyi olanlar və digər xüsusi kateqoriyalara aid olan şəxslərə Prezidentin aylıq təqaüdləri ödəniləcək.
2018-ci ilin əvvəli ilə müqayisədə pensiyaların orta aylıq məbləği 70%-ə yaxın, müavinətin orta aylıq məbləği 2 dəfə artıb. Təqaüdün maksimum məbləği isə 54% artıb. Əlilliyi olan şəxslərə pensiya, müavinət, təqaüd formasında ödənişlərin ümumi illik məbləği isə 2018-2021-ci illərdə 55% artaraq, 1 milyard 611 milyon manat təşkil edib.
