Əmək və Əhalinin Sosial Müdafiəsi Nazirliyi “Hökumət buludu”na Keçid Planına əsasən, informasiya sistemlərini Rəqəmsal İnkişaf və Nəqliyyat Nazirliyinin tabeliyindəki “AzInTelecom” MMC-yə məxsus “AZCLOUD” Data Mərkəzinə tam miqrasiya etdirib. Bu barədə 1 aprel tarixində nazirlik məlumat verib.
“Hökumət buludu” layihəsinin məqsədi dövlət informasiya sistemlərinin və ehtiyatlarının vahid platformaya inteqrasiyası nəticəsində idarəçiliyin optimallaşdırılması və keyfiyyətinin artırılmasıdır.
Sözügedən keçid prosesi “AzInTelecom” MMC və Əmək və Əhalinin Sosial Müdafiəsi Nazirliyinin DOST Rəqəmsal İnnovasiyalar Mərkəzinin birgə səyləri ilə bu günlərdə yekunlaşdırılıb və hazırda nazirliyin bütün İT infrastrukturu “Hökumət buludu” üzərindən fəaliyyətini davam etdirir.
Məlumata əsasən, “AZCLOUD”-a “Bulud infrastrukturu”, “Yerləşdirmə”, “AZCLOUD Drive”, “Arxivləşdirmə”, “Rezervlənmə”, “Microsoft” məhsulları, “Videokonfrans” və “Virtual İP Telefoniya” kimi xidmətlər daxildir.
“Hökumət buludu” layihəsinin keyfiyyətli və effektiv icrası məqsədilə bir sıra qabaqcıl ölkələrin, o cümlədən ABŞ, Böyük Britaniya, Türkiyə, Norveç, İrlandiya və Estoniyanın təcrübəsi də öyrənilib.
[gallery columns="2" size="large" link="file" ids="39928,39930"]
