Ölkəmizdə artıq qış fəsli başlayıb. Qarlı və yağışlı hava şəraitində avtomobil idarə edə bilmək üçün sürücülər qış rejminə hazırlaşırlar. Bəs bu hazırlıq neçəyə başa gəlir? Bu barədə İnsanoid araşdırma aparıb.
Mütəxəssislərin fikrincə, qarlı və buzlu havada avtomobili problemsiz sürmək üçün ilkin olaraq avtomobillərin təkərləri dəyişilməli və qış təkərlərinə keçilməlidir. Lakin bundan əvvəl nəqliyyat vasitəsinin ön və arxa hissəsində olan çatışmazlıqlar aradan qaldırılmalıdır. Həmçinin avtomobilin şassisində hər hansısa nasazlıq mövcuddursa, onlar da aradan qaldırılmalıdır.
Qeyd edək ki, ölkənin onlayn təkər mağazalarında qış təkərlərinin qiymətləri 84 manatdan başlayır. Misal üçün, 185/65/15 ölçülü Pirelli markalı təkərlərinin qiyməti "Radius" təkər mərkəzində 1 ədədi üçün 110 manat təşkil edir. "Təkər evi" mağazasında isə eyni ölçülü Lassa markalı təkərləri 94 manata, tekerstore.az portalında isə 84 manata satılır.
Eyni zamanda avtomobil üzrə ekspertlər söyləyirlər ki, qış mövsümündə maşınların yağları da yenilənməlidir. Yayda istifadə edilən mineral və yarımsintetik yağlar sintetik yağlarla əvəz olunmalıdır.
Sürücülərin soyuq fəsillərdə üzləşdikləri digər problem isə mühərrikin donmasıdır. Bununla qarşılaşmamaq üçün antifriz maddəsinin dəyişdirilməsi tövsiyə olunur. Bu maddənin standartlara uyğun olub olmamasını yoxlamaq üçün avtomobil ustasına yaxınlaşıb xüsusi aparatla maddənin donma dərəcəsini ölçdürmək lazımdır. Antifrizin qiymətləri istehsalçı şirkətdən və donma dərəcəsindən asılı olaraq 1 litri üçün 5 manatdan başlayır.
