Aqrar Xidmətlər Agentliyinin Bitki Mühafizəsi və Fumiqasiya (zərərsizləşdirmə) Mərkəzi tərəfindən 2022-ci ilin fevral ayı ərzində 27 min ton dənli və paxlalı bitkilərin məhsulları, yemlər, texniki yüklər, qurudulmuş meyvələr, 16 m3-dən çox meşə materialları, 1022 m3 saxlanma yeri, 78 m3 yaş meyvə-tərəvəz, 20 min m2 istixana zərərsizləşdirilib. Bu haqda martın 14-də Kənd Təsərrüfatı Nazirliyinin saytında məlumat verilib.
Keçirilən tədbirlər nəticəsində idxal olunan məhsullarda zərərvericilərin ölkə ərazisinə daxil olmasının qarşısı alınıb.
Fumiqasiya zərərverici həşəratların və digər zərərli orqanizmlərin məhv edilməsi üçün görülən tədbirlərdir. Bu proses məhsulların becərilməsi, saxlanması, daşınması, satışı və ixracı ilə məşğul olan hüquqi və fiziki şəxslər üçün məcburidir.
Xidmətdən istifadə etmək üçün sahibkarlar Bitki Mühafizəsi və Fumiqasiya Mərkəzinə telefon (012-563-58-45 (daxili:126); 050-644-74-15; 070-965-62-14) və ya poçt ([email protected]) vasitəsilə müraciət edə bilərlər.
