“Məşğulluğa Dəstək Layihəsi” çərçivəsində 2674 işsiz şəxsə biznes təlimlər keçirilib. Bu haqda Dövlət Məşğulluq Agentliyinin saytında məlumat verilib.
48 region üzrə keçirilən təlimlərdə iştirak edənlərin 466-sı müharibə iştirakçısı və şəhid ailəsi üzvüdür.
Proqramda kiçik biznesin təşkili və idarə olunması üzrə bilik və bacarıqlar öyrədilir və biznes planlar hazırlanır. Növbəti mərhələdə qiymətləndirmə komissiyası tərəfindən ən uğurlu biznes plan seçilərək aktivlərlə təmin olunur.
“Məşğulluğa Dəstək Layihəsi”-nin əsas məqsədi işsiz şəxslərin özünüməşğulluq fəaliyyətinə cəlb edilməsi və onlara kiçik biznesə çıxış imkanlarının yaradılmasıdır. Ümumilikdə 22 min işsiz şəxsin özünüməşğulluq proqramı üzrə kiçik bizneslərinin qurulması planlaşdırılır.
Layihəyə qoşulmaq istəyənlər "Layihələr üzrə müraciət forması"-nı dolduraraq qeydiyyatdan keçə bilərlər.
