Hər bir istehlakçı aldığı malda qüsur aşkarladıqda malı geri qaytarmaq, dəyişdirmək, yenidən sifariş vermək, qiymətləri aşağı salmaq hüquqlarından istifadə edə bilir.
Öz növbəsində satıcı və ya istehsalçı istehlakçıdan lazımi keyfiyyəti olmayan malı geri götürməyə və yuxarıda göstərilən istehlakçının tələblərindən hər hansı birini yerinə yetirməyə borcludur.
Əgər istehlakçının dəyişdirmək istədiyi məhsul yoxdursa, müvafiq ərizənin verildiyi andan etibarən mağaza tərəfindən iki ay müddətində malın dəyəri ödənilməlidir. Məhsulun dəyişdirilməsi zamanı qiymət artımı olarsa, istehlakçı qiymət fərqini ödəməməlidir.
Alıcı məhsuldan istifadə etməyibsə və onun əmtəə görünüşü, yarlığı və kassa qəbzi saxlanılıbsa istehlakçı 14 gün ərzində həmin malı dəyişdirə bilər.
Eyni zamanda elə məhsullar var ki, onların dəyişdirilməsi və qaytarılması qadağandır. Qanunvericiliyə əsasən, qızıl və qızıl məmulatları, qiymətli və yarımqiymətli metallardan, daşlardan hazırlanmış məmulatlar, bütün növ parçalar və ölçü ilə satılan mallar, parfümer-kosmetika malları, kişi, qadın və uşaq çimərlik paltarları, məişət kimyası malları, şəxsi gigiyena əşyaları,uşaq oyuncaqları, dəyəri ödənilmiş və mağazadan çıxarılmış ərzaq malları geri qaytarılmır.
Hüquqları pozulan vətəndaşlar Antiinhisar Siyasəti və İstehlakçıların Hüquqlarının Müdafiəsi Dövlət Xidmətinə müraciət edə bilər.
