Masallıda 7 il əvvəl baş verən qətlin yeni təfərrüatı məlum olub. Bu haqda aprelin 13-də Baş Prokurorluq məlumat yayıb.
Belə ki, 5 iyul 2015-ci il tarixdə Masallı rayon sakini Səidə Cəfərova evdən çıxaraq bir daha geri qayıtmayıb. Faktla bağlı cinayət işi başlanıb, lakin qadının tapılması mümkün olmadığından iş üzrə icraat dayandırılıb.
Sonradan Səidə Cəfərovanın öldürülməsinə əsaslı şübhələr müəyyən edildiyi üçün 8 fevral 2022-ci il tarixdə iş üzrə icraat təzələnib.
Məlum olub ki, Əfrail Məmmədov qeyd edilən tarixdə əmisi qızı Səidə Cəfərovanı əkin sahəsinə apararaq orada mübahisə zamanı bıçaqla qadının boğaz nahiyəsinə bir dəfə qəsdən vurmaqla onu öldürüb.
Daha sonra o, qadının meyitini çayın kənarındakı qamışlıq ərazidə gizlədib. Təxminən 25-30 gün sonra meyiti gizlətdiyi yerə gedərək sümüklərin göründüyünü görüb. Cinayətini gizlətmək məqsədilə balta ilə meyitin başını ayıraraq torpağa basdırıb. Digər sümüklərini isə yandırıb.
Əfrail Məmmədov əməlini etiraf edib. Onun barəsində Cinayət Məcəlləsinin “qəsdən adam öldürmə” və “meyit üzərində təhqiredici hərəkətlər etmə” maddələrilə həbs qətimkan tədbiri seçilib.
