Dekabrın 21-də Baş Prokurorluq media subyektlərini və sosial şəbəkə istifadəçilərini şəxsi həyatın toxunulmazlığını pozan, dövlət sirri təşkil edən, intiharı təbliğ edən, uşaqlar üçün zərərli olan və digər qadağan edilmiş məlumatları ictimailəşdirməməyə çağırıb.
Məlumata əsasən, 2021-ci ilin 16-17 dekabr tarixlərində sosial media platformalarında konkret faktlara əsaslanmayan qərəzli məlumatların sensasiya naminə yayılmasına görə 4 nəfərə xəbərdarlıq edilib.
Həmçinin dekabrın 18-də öz fərdi media hesabında ölkənin hərbi strukturlarının fəaliyyətinə dair yayımlanması qanunla qadağan edilən məlumatları paylaşan jurnalist 500 manat məbləğində cərimə edilib.
“Olke.az”, “manevr.az” və digər internet informasiya portalları isə intiharla bağlı qanunsuz olan məlumatları yayımladıqlarına görə 1 500 manat məbləğində inzibati cərimə alıblar.
Bununla yanaşı, dekabrın 20-də Qusar rayonunun Yuxarı Zeyxur kəndində orta məktəbin direktoruna internetdə intiharla bağlı qadağan edilmiş məlumatları yaydığına görə xəbərdarlıq edilib.
