Ölkədə dekabrın 10-da mediada hansı informasiyaların dərc olunmasına dair qadağalar açıqlanıb. Tələblər pozulduqda Audiovizual Şura tərəfindən yayım dayandırıla bilər. Bu, “Media haqqında” qanun layihəsində əksini tapıb.
Mediada konstitusiya quruluşunun dəyişdirilməsinə, ərazi bütövlüyünün parçalanmasına və hakimiyyətin ələ keçirilməsinə dair çağırışlar edilməməlidir. Bununla yanaşı, irqi, dini, mənşə, cinsi, etnik və digər ayrıseçkilik, habelə terrorçuluq, dini ekstremizm, zorakılıq, qəddarlıq, sağlamlığın və ətraf mühitin qorunmasına zidd olan hərəkətlər təbliğ olunmamalıdır.
Həmçinin söyüşlər, əxlaqsız jestlər, pornoqrafiya məzmunlu materiallar, parapsixologiya, ekstrasens və ya digər xürafələr barədə məlumatlar istifadə edilə bilməz. Qeyd edilənlərdən başqa, şərəf və ləyaqətin alçaldılmasına, şəxsin ailə və öz həyatına aid sirr olan və məhkəmə qərarı olmadan bir adamın təqsirli olması barədə məlumatların dərc edilməsinə yol verilməməlidir. “Uşaqların zərərli informasiyadan qorunması haqqında” və “İnformasiya, informasiyalaşdırma və informasiyanın mühafizəsi haqqında” qanunlarda nəzərdə tutulmuş tələblərə əməl edilməlidir.
Qanuna əsasən, Ümumxalq hüzn, Anım və matəm günlərində komediya və erotik filmlər, viktorinalar, reklam və matəm günlərinin mahiyyətinə uyğun olmayan digər proqramlar yayımlana bilməz. Azı hər iki saatda bir dəfə ümumxalq hüzn, Anım və matəm günü ilə bağlı məlumat verilməlidir və saat 12:00-da bir dəqiqəlik sükut elan edilməlidir.
Bu tələblər pozulduqda yayım Audiovizual Şura tərəfindən 24 saat, 1 ayadək və dərhal dayandırıla bilər.
