Son illərdə dünyada bütün ərzaq məhsullarının qiymətlərində kəskin artımlar qeydə alınır. Bu artım son 30 ilin ən yüksək göstəricisidir. Ölkəmizin daxili bazarında qiymət artımlarının əsas səbəblərindən biri məhz idxal olunan məhsulların idxal bazarlarında qiymətinin artmasıdır. Bu barədə 5 yanvar tarixində iqtisadiyyat naziri Mikayıl Cabbarova istinadən Report məlumat verib.
Nazirin sözlərinə görə, qiymət artımlarının təsirlərini minimuma endirmək üçün yeganə yol ölkə daxilində ərzaq məhsullarının istehsalının tam dəyər zəncirini formalaşdırmaq və 100%-lik lokalizasiyaya nail olmaqdır.
“Hökumətin qarşıdakı dövrdə də əsas hədəflərindən biri yüksək əlavə dəyər yaradan emal sənayesinin sürətli inkişafıdır”, - deyə Mikayıl Cabbarov bildirib. O, həmçinin məlumat verib ki, regionlarda məhsul istehsalı və emalı üzrə ixtisaslaşmanın dərinləşdirilməsi, işləməyən və ya zərərlə işləyən müəssisələrinin yenidən qurulması nəzərdə tutulub.
Qeyd edək ki, 2021-ci ilin 9 ayı üzrə idxal qiymətləri indeksi ötən ilin müvafiq dövrü ilə müqayisədə 21,5% artıb.
