Mikro və kiçik sahibkarlıq subyektlərinin istehsal etdikləri məhsulların ticarət şəbəkələrində satışının genişləndirilməsi üçün 1 dekabr tarixində Prezident tərəfindən Sərəncam imzalanıb.
Belə ki, Kiçik və Orta Biznesin İnkişafı Agentliyi (KOBİA) tərəfindən ticarət obyektlərində rəflər, piştaxtalar, stellajlar icarəyə götürüləcək və orada sahibkarlar üçün stendlər təşkil ediləcək.
Agentlik tərəfindən icarəyə götürülən satış yerləri barədə məlumat Agentliyin rəsmi internet səhifəsində yerləşdiriləcək.
Sahibkarlar məhsullarını satış yerlərində yerləşdirmək üçün KOBİA-ya müraciət edəcəklər. Daxil olmuş müraciətlər müəyyən edilmiş meyarlara əsasən qiymətləndiriləcək və daha uyğun gələn sahibkarlara üstünlük veriləcək.
Satış sahəsinin ölçüsü 50 santimetr olacaq. Məhsulların çeşidlərinin sayı və ölçüləri nəzərə alınaraq satış sahəsinin ölçüsü əlavə 50 santimetrədək artırıla bilər. Sahibkarnan imzalanan müqavilənin müddətinin 3 ay olması nəzərdə tutulub. Lakin Agentliyin qərarı ilə müddət bir dəfə daha 3 ayadək uzadıla bilər.
Satış sahəsinin sahibkarın istifadəsinə verilməsi ödənişli qaydada həyata keçiriləcək. Mikro sahibkarlıq subyekti satış sahəsinə görə Agentliyin ödədiyi icarə haqqının 20%-ni, kiçik sahibkarlıq subyekti isə 50%-ni Agentliyə ödəyəcək.
KOBİA tərəfindən bir təqvim ili ərzində icarəyə götürülən satış yerlərinin sayı 10-dan çox, icarəyə götürülən bir satış yerinə görə illik icarə haqqı isə 20 min manatdan artıq ola bilməz.
