Suraxanı Rayon Polis İdarəsinin əməkdaşları narkotik vasitələrin qanunsuz satışı ilə məşğul olan 6 nəfəri, dövriyyəsi ilə məşğul olan 39 nəfəri saxlayıb. Bu haqda dekabrın 7-də Daxili İşlər Nazirliyi məlumat verib.
Əməliyyat son 15 gün ərzində Hövsan, Əmircan, Bülbülə, Yeni Günəşli və digər qəsəbələrdə keçirilib. Narkotikin satışı ilə məşğul olan şəxslərdən 2 kiloqrama yaxın müxtəlif xassəli narkotik vasitə, psixotrop maddə və satışı qadağan edilən həblər aşkar edilib.
Aparılan araşdırma nəticəsində narkotik vasitələrin qanunsuz dövriyyəsi ilə məşğul olanlardan da külli miqdarda narkotik vasitə və psixotrop maddə tapılıb.
Eyni zamanda Yeni Günəşli qəsəbəsində 5 mənzildən oğurluq edən şəxs və 600 manat saxta əskinası hazırlayaraq dövriyyəyə buraxmağa çalışan iki şəxs saxlanılıb.
Faktlarla bağlı araşdırmalar davam edir.
