Narkotikin təsiri altında avtobus idarə edən şəxs həbs olunub. Bu haqda dekabrın 16-da Baş Dövlət Yol Polisi İdarəsindən (BDPİ) məlumat verilib.
Qeyd edilib ki, dekabrın 13-də "Mercedes-Benz" markalı iritutumlu marşrut avtobusu Qaradağ postu kimi tanınan ərazidə saxlanılıb. Sürücünün şübhəli hərəkətlər etdiyi üçün o, tibbi müayinədən keçirilib. Müəyyən edilib ki, sözügedən şəxs sərnişinlərin həyatını təhlükə altına qoyaraq avtobusu narkotikin təsiri altında sürüb.
Məhkəmənin qərarı ilə vətəndaş 2 il sürücülük hüququndan məhrum edilməklə 20 gün müddətində inzibati həbs olunub.
BDPİ-nin hesabatına əsasən, cari ilin 9 ayı ərzində narkotik vasitələrin təsiri altında avtomobil idarə edən 650 sürücü aşkar edilib.
