Son günlərdə Beynəlxalq Bank (ABB) adından saxta hədiyyə kampaniyaları təqdim olunan mesajlarla bağlı vətəndaşlara xəbərdarlıq edilib. Bu barədə martın 14-də Rəqəmsal İnkişaf və Nəqliyyat Nazirliyi məlumat yayıb.
Belə ki, kiberdələduzlar ABB-nin rəsmi saytı ilə heç bir əlaqəsi olmayan veb-resursda vətəndaşlara saxta hədiyyə kampaniyası vəd edir. Saxta kampaniyadan “qazanılan” məbləği əldə etmək üçün isə istifadəçidən bank və digər fərdi məlumatlar tələb olunur.
“Məqsəd istifadəçiləri “tələyə salmaq”la asan yolla maddi vəsait əldə etməkdir”, - deyə nazirlikdən vurğulanıb.
İstifadəçilərdən aşağıdakı kibertəhlükəsizlik qaydalarına əməl etmələri xahiş olunur:
- Aldığınız hər mesaja şübhə ilə yanaşın və cəlbedici vədlərə aldanaraq ani hərəkət etməyin;
- Hədiyyə, pulsuz bonus və mükafat təklif edən vədlərə etimad etməyin;
- Şübhəli keçidlərə daxil olmayın;
- Hər zaman məlumatın düzgünlüyünü fərqli əlaqə vasitələrindən istifadə edərək yoxlayın;
- Doğruluğundan əmin olmadığınız mesajları digər şəxslərə yönləndirməyin və ya sizə yönləndirilən mesajlara etibar etməyin.
Bu kimi hallarla üzləşdikdə vətəndaşlardan cert.az saytı və ya [email protected] elektron poçt ünvanı vasitəsilə Elektron Təhlükəsizlik Xidmətinə məlumat vermələri xahiş olunur.
